Amurriok Emakumeen Etxea eta Haur Kontseilua diseinatzeko lehen pausoak eman ditu

Amurrioko Udala bi proiektu zehazten hasi da, Amurrioko Emakumeen Etxea eta Haur Kontseilua diseinatzeko laguntza teknikoa esleituz.

Etorkizuneko Amurrioko Emakumeen Etxea sortzeko lehen pausoa diagnostiko-prozesua izango da, eta Sortzen Consultoría S.L.-ren eskutik egingo da. Lehen pauso horretan, Emakumeen Etxeen eredu posibleak ezagutu nahi dira, Amurriori ondoen egokitzen zaizkion alderdiak zentratu ahal izateko.

Amaitutakoan, Emakumeen Etxearen diagnostikoak udalerriko emakumeekin partaidetza-prozesu batean kontrastatu ahal izango den Kudeaketa Plana izango du.

“Tipi Gara S. Coop Pequeña”-ren bidez martxan jarritako beste ekimen bat Amurrioko Haur Kontseilua sortzea bultzatzea izango da. Horretarako, Amurrioko Haur Kontseiluaren oinarriak diseinatu eta finkatuko dira, kontseiluaren eredua zehazteko, haren helburuak eta funtzionamendua kontuan hartuta.

 

Amurriok bat egin du Dagazekin, dantza garaikidearen zaleen sarearekin

Dagaz Sarea martxoaren 11tik aurrera helduko da Amurriora, Amurrioko Udalaren harrerarekin, eta Proyecto Larrua konpainiaren eskutik ekingo dio bere abenturari. Dantza garaikidearen zaleak zorioneko daude; izan ere, aukera izango dute sarean modu aktiboan parte hartzeko, saioetara joanez eta baita ikusle gisa ere.

“Zuzeneko dantza eta arte eszenikoak definitzen dituen jarduteko modu artisanal bat markatzen du DAGAZ programak. Helburua dantza garaikidearen jardunbidea sustatzea da, Euskadin dantza garaikideko talde amateurren sare bat sortuz”, adierazi dute Dagaz Saretik. Zirkuitu horretan hiru modutan parte hartu ahal izango da, modu aktiboan, asteroko edo noizbehinkako saioekin, edo ikusle gisa.

Dantzatzeko, sortzeko eta partekatzeko saioak ostegunetan izango dira, 18:00etatik 20:00etara, martxotik maiatzera, Proyecto Larruaren eta Euskal Herriko koreografoen eskutik. Noizbehinkako saioak ere egongo dira, Dagaz sareko koreografoekin dantzaz eta mugimenduaz gozatzeko. Gainera, dantza garaikideaz ‘ikusle berezi’ gisa gozatzeko aukera ere badago, Amurrion edo Dagaz Sareko beste udalerri batzuetan egiten diren emanaldietara joan ahal izateko.

Izena emateko bidali mezu elektronikoa dagaz@dantza.eus helbidera. Asteroko dantza-saioek 15 lagunentzako lekua izango dute; hautatuen zerrenda izen-ematearen arabera egingo da.

Amurrio izango da Euskadiko hainbat herritan hedatzen ari den Dagaz Sarean parte hartuko duen Arabako lehen herria. Herri horien artean daude Durango, Berriz eta Trapaga Bizkaian, eta Zumaia, Lezo eta Hernani Gipuzkoan.

Koadernaketa ikastarorako izen-ematea zabalik Amurrioko kultur etxean

Amurrioko Udala Arte Eskolaren eskaintza dibertsifikatzen ari da, koadernaketa ikastaro batekin. Pertsonen profil berrien parte-hartzea sustatu nahi duen diziplina da. Tailerrak 12 saio izango ditu eta martxoan hasiko da. Izen-ematea Kultur Etxean egin daiteke.

Koadernaketa ikastaroa kartoia lantzean oinarritzen da, papera eta kartoia bezalako material birziklagarriekin egindako diseinuak pausoz pauso sortzeko helburuarekin. Montserrat González Barredo Arte Ederretako profesionala eta Amurrioko Arte Eskolako pintura irakaslea arduratuko da tailerra emateaz.

Ikastaroa martxoaren 5ean hasiko da eta 12 saio izango ditu, guztiak ostiraletan 10:00etatik 13:00etara, ekainaren 4ra arte. Ikastaroan gehienez 15 ikasle egon daitezke, beraz, izena eman beharko da Kultur Etxean.

 

 

 

Zabalik dago 2021erako Gizarte Larrialdietarako Laguntzak eskatzeko epea

Amurrioko Udaleko Gizarte Ekintza Sailak zabaldu du 2021eko ekitaldirako Gizarte Larrialdietarako Laguntzak (GLL) eskatzeko eta izapidetzeko epea. Eskaerak urte osoan zehar egin ahal izango dira, Oinarrizko Gizarte Zerbitzuarekin hitzordua eskatuta.

Gizarte Larrialdietarako Laguntzak, gero eta maizago gertatzen diren egoera ekonomiko txarrek eragindako beharrizan pertsonalak eta familiarrak prebenitzeko eta horiei erantzuteko funtsezko baliabideak dira. Hainbat kontzeptutarako eska daitezke Gizarte Larrialdietarako Laguntzak, hauetarako, besteak beste:

  • Etxebizitza alokatzeko gastuetarako, modalitate guztietan.
  • Gizarte larrialdiko egoera baino lehen hartutako kredituen interes- eta amortizazio-gastuetarako.
  • Etxebizitzaren mantentze-gastuetarako, hala nola ur-, zabor- eta estolderia-gastuak, hiri- eta landa-ondasun higiezinen gaineko zerga eta energia-gastuetarako.
  • Altzarien eta “linea zuria” izenez ezagutzen diren etxetresna elektrikoen gastuetarako.
  • Etxebizitzako egokitzapen-, konponketa- edo/eta oinarrizko instalazio-gastuetarako.
  • Bizikidetza-unitateko pertsona baten edo gehiagoren oinarrizko premiei lotutako gastuetarako, jantzietarako edo sistema publikoek estaltzen ez dituzten hezkuntzarako eta prestakuntzarako eta osasun-arretarako.

 

Laguntza horiek emateko, Oinarrizko Gizarte Zerbitzuak larrialdi egoera baloratu beharko du, eta baita atal horretara bideratutako partidaren aurrekontu-esleipena ere.

Gizarte Larrialdietarako Laguntzak lehen aldiz eskatu edo laguntza horiek berritu nahi dituztenek, hitzordua eskatu beharko dute Oinarrizko Gizarte Zerbitzuan, Udaleko Herritarren Arreta Zerbitzuan, 945 89 11 61 zenbakira deituta, haz-sac@amurrio.eus helbide elektronikora idatzita edo Oinarrizko Gizarte Zerbitzura bertara joanda.

 

Amurrioko Udaleko adierazpen instituzionala

2021eko otsailaren 18an Amurrioko Udalaren Bozeramaleen Batzordeak aho batez

ERABAKI DU:

Azken bi asteetan 249 kaleratze iragarri dituzte Aiaraldeko bi enpresek.

2021eko otsailaren 4an, Valvospaingo zuzendaritzak 79 langile kaleratuko zituela jakinarazi zuen, eta enpresa erabat itxiko zuela iragarri zuen, hartzekodunen konkurtso batean egon ostean.

Tubacexeko zuzendaritzak otsailaren 8an jakinarazi zion enpresa batzordeari Amurrioko eta Laudioko plantillako 150 langile kaleratzeko asmoa zuela.

Bi adierazpenak, eskualdean beste negozio txiki eta ertainen galerarekin batera, kolpe latza dira Amurrioko eta eskualde osoko industria-ehunarentzat eta enpleguarentzat, enplegu asko galdu direlako eta jarduera murriztu delako eskualdeko bi ekoizpen-zentrotan.

Amurrioko Udalak, adierazpen instituzional honen bidez, bere kezka adierazten du bi erabakien aurrean, eta, aldi berean, bere esku dauden xedapen guztiak emateko borondatea adierazten du, enpresek iragarritako neurriak gauza ez daitezen.

  1. Amurrioko Udalak Valvospain enpresako langileei eta kaltetutako familiei elkartasuna adierazten die.
  2. Amurrioko Udalak elkartasuna adierazi die Tubacexek Amurrion eta Laudion dituen lantegietako langileei eta eragindako familiei, eta enpresa animatu du enplegu-erregulazioko espedientea bertan behera uztera, Amurrioko eta Laudioko lantegietan enpleguari eustea bermatuko duen akordio bat har dadin.
  3. Amurrioko Udalak enplegua suntsipenagatik kezka adierazi du, eta enpresa estrategikoen jarduera galtzea deitoratu du, enpresa horiek funtsezko eragileak baitira eskualde osoko industria-garapenean. Horregatik, Tubacex Amurrioko eta Laudioko traktore sozioekonomikoa izaten jarrai dezan laguntzeko prest agertu da, baita egoera iraultzeko eta eskualde osoan ohiko jarduera, enplegu eta kalitatezko lan-baldintzen ratioak ahalik eta lasterren berreskuratu ahal izateko lan egiteko ere.
  4. Amurrioko Udalak kalitatezko enplegua defendatzeko eta, Amurrion zein Aiaraldean etorkizuneko industria-proiektu bati eusteko konpromisoa berretsi du. Era berean, Arabako Foru Aldundiari, Eusko Jaurlaritzari eta Espainiako Gobernuari eskatzen die modu proaktiboan joka dezatela industria-jarduerari eustearen alde eta kalitatezko enpleguaren alde gure sare ekonomikoan eta, bereziki, lurralderako proiektu estrategikoetan.
  5. Amurrioko Udalak Euskal Autonomia Erkidegoko Legebiltzarrari eskatzen dio bizkortu ditzala Aiaraldeko Gizarte eta Ekonomia Suspertzeko Lantaldearen lanak, ahal den neurrian, ahalik eta lasterren aktibatzeko eskualdearen egoera larriagotzeari aurre egiteko behar diren neurriak.
  6. Era berean, Amurrioko herritarrei dei egiten diegu gure herriko enpleguaren aldeko ekimenak eta mobilizazioak babestera.

 

Amurrioko Udalaren erakunde adierazpena Sestaoko heriotza gaitzesteko eta kondenatzeko

Genero-indarkeriaren biktimei arreta eskaintzean parte hartzen duten eragile guztiek 2014ko maiatzaren 16an sinatu zuten erakundeen arteko jarduketa eta koordinazioko erakunde-protokoloa, genero-indarkeriaren biktimen arreta hobetzeko. Hain zuzen, dokumentu horretan ezarritakoa betez, udal honek erabaki du udaleko alderdi politiko guztien eskutik honako hau onartzea:

SESTAOKO HERIOTZA GAITZESTEKO ETA KONDENATZEKO ERAKUNDE-ADIERAZPENA

Ondo dakigun bezala, emakumeen kontrako indarkeria, gure gizartean emakumeen eta gizonen artean dagoen desberdintasunaren sinbolo basatiena da, eta emakumeen duintasunaren eta integritate fisiko eta moralaren kontrako atentatu jasanezina da eta, ondorioz, Giza Eskubideen bortxatze larria eta onartezina dakar berarekin.

Sestaoko emakume baten erailketa dela eta, hilketa horren aurreko gure erabateko gaitzespena adieraziz.

Hori dela eta, Amurrioko Udalak adierazten du

1.- Amurrioko Udalak guztiz kondenatzen du Sestaoko heriotza, eta horri dagokienez, erabat arbuiatzen eta sumintzen duela adierazten du.

2.- Solidariotasun eta hurbiltasun osoa erakusten dio biktimaren familiari eta lagunei.

3.- Gogorarazten dugu gizarteko gaitz horren aurka elkarrekin borrokatzeko erantzukizuna eta premia ditugula gizartearen, erakundeen eta herritarren instantzia guztiok, eta ahotsa altxatu eta salatu egin behar dugula erabat eta salbuespenik gabe indarkeria edota bortxa matxistaren edozein zantzu.

4.- Gainera, biktimen eta senideen esku jarri behar ditugu genero-indarkeriako kasuei aurrea hartzeko eta arreta eskaintzeko beharrezkoak diren baliabideak.

5.- Amurrioko herritarrei gogorarazten die milaka emakumeri zuzenean eragiten dieten gertakari mota horiek ez daudela gizartetik eta eguneroko bizitzatik heriotza hauek emakumeen aurkako indarkeriaren adierazpen handiena da, baina egunerokoan emakumeen aurkako eraso horien adierazpen eta jarrera asko gertatzen dira, eta horiek guztiak kondenagarriak eta gaitzesgarriak dira.

6.- Ildo horri jarraikiz, herritarrak animatzen ditugu jarrera aktiboa hartzera emakumeen aurkako edozein indarkeria-adierazpenen aurrean: berau salatzera, ez onartzera, isilik ez egotera eta biktimei babesa erakustera.

7.- Halaber, deia egiten zaie amurrioarrei 2021eko otsailaren 13an 18:00etan Amurrioko plazan bost minutuko kontzentraziora hilketa honen aurreko gaitzespena adierazteko

Amurrion, 2021eko otsailaren 12an

Amurrioko Udalaren 2021eko aurrekontu-proiektua 15.401.948 milioi eurokoa da

Amurrioko Udaleko gobernu-taldeak 2021eko ekitaldirako duen aurrekontu-proiektua Covid-19aren pandemiak sortutako testuinguru sozioekonomikoak markatu du. Kontuak 15.401.948 eurora heltzen dira, eta helburua, COVID-19ak pertsona ahulenen eta sektore ekonomiko kaltetuenen artean izan dituen ondorioei aurre egitea da, pertsonak eta haien ongizatea, zerbitzu publikoak eta enplegua udal-politiken erdigunean jarriz.

Txerra Molinuevo alkateak azaldu duenez, aurrekontuek “pertsonak udal politikaren erdigunean jartzea eta zerbitzu publikoak hobetzea dute helburu. Aurrekontu zorrotza, errealista eta iraunkorra da, inoiz ezagutu gabeko osasun, ekonomia eta gizarte arloko larrialdi agertokiari aurre egiteko”.

Inbertsioen kapituluak aurrekontuaren % 16,15 hartzen du, hau da, 2.487.700 €. Inbertsio horien artean daude Etxegoienbidean aparkaleku bat eraikitzea, eta horrek, halaber, bizikletentzako eta oinezkoentzako sarbidea izango duen eremua berroneratzea ekarriko du. Lan horiek amaitzeko, argiteria berriztu egingo da, energia-eraginkortasun irizpideak kontuan hartuta, eta Larrabeko zabortegia behin betiko zigilatuko da. Udalerriko saneamendu-sareak berritzeko lanek ere jarraitu egingo dute. Skate park bat ere eraikiko da, aisialdirako espazio berriak eskainiz, ludoteka egokituko da, eta padel eta tenis pista estaliak eraikiko dira Reforren. Gainera, Berdintasun Sailak emakumearen etxearen inguruko diagnostikoa landuko du eta Amurrioko V. Berdintasun Plana lantzen hasiko da.

“Aurrekontuak, udalerriko proiektu estrategikoetan aurrera egiten jarraitzeko inbertsio-atal garrantzitsu bat ere jasotzen du, Amurrio atseginago, irisgarriago eta jasangarriagorantz pausoak ematen jarraitzeko helburuarekin”, azaldu du Amurrioko Udaleko alkateak.

Egungo ezegonkortasun eta ziurgabetasun ekonomikoak erantzukizunez jokatzea eskatzen du. Gizarte arloko eta tokiko jarduera ekonomikoa sustatzeko lehentasunak aurrekontu-proiektuaren bi ardatz garrantzitsu dira. Batetik, gizarte-zerbitzuetara zuzendutako partida handitu egin da, eta, bestetik, merkatari txiki eta ertainen Apymca elkarteari merkataritzarako bonu-kanpainak bultzatzeko emandako diru-laguntza handitu egin da. “Ekonomia suspertzeko iazko udan martxan jarri zen ‘Amurrion bizi’ kanpainaren helburuei jarraipena emango diegu, herritarrei, egoera zaurgarrian dauden pertsonei eta egungo egoerak gehien kaltetutako sektoreei zuzenduta”, azaldu du Molinuevok.

Enplegura bideratutako partidak bere dotazioari eutsiko dio eta 408.569 euro izango ditu udal, gazte eta eskualde mailako enplegu planak bultzatzen jarraitzeko. Gainera, 167.000 euro bideratuko dira udalerriko Administrazio Batzarretan egin beharreko jarduketetara, eta 100.000 euro auzoetako batzarretatik sortutakoetara. Bestalde, herritarren parte-hartzearen arloa indartu egingo da herritarren partaidetza aktiboan eta gizartea eraldatzeko gaitasunean oinarritutako partaidetzazko ekintzak bultzatzeko.

Kultura bultzatzea izango da, aurrerantzean ere, Udalaren balio garrantzitsuenetako bat, iaz bezala, kultura kalera ‘atereaz’, herritar guztien gozamenerako. Bestalde, Amurrion egiten diren jarduera askoren ardatz nagusia den udalerriko elkarte-sareak aurrekontuaren % 5 jasoko du, hau da, 771.705 euro.

“Covid-19ren pandemiak asko baldintzatzen du 2021erako aurrekontua, Arabako Foru Aldundiaren diru-bilketaren jaitsierarengatik, neurri batean, eta horrek FOFELen bitarteko diru-sarrera txikiagoa dakar. Ahalik eta adostasun handiena bilatuko dugu; izan ere, une delikatu honetan, aurrekontuak onartzea gure bizilagunen beharrei erantzuten jarraitzeko tresna da. Aurtengo aurrekontuetan, Amurrioko PSE-EErekin adostu ondoren iaz egin ezin izan ziren ekintzak jasotzen dira, eta gaiari berriro heldu ondoren, 2021ean gauzatuko dira”, azaldu du Txerra Molinuevo Amurrioko alkateak.

“Indarrak batzeko eta gobernu taldearekin elkarlanean aritzeko unea da. Amurriok erantzukizun hori merezi du, herritarrek egungo egoera konplexuan ditugun ezberdintasunak alde batera uzteko eskatzen digute. Gure zerbitzu publikoak finkatzera eta horretarako programa zehatzak dituen Amurrio inklusiboago baten alde lan egitera bideratutako aurrekontuak dira, eta ondo definitutako eta aukera politiko desberdinen artean partekatutako edukia dute”, azaldu du David Romero Amurrioko Udaleko PSE-EEko zinegotziak.

Mugiamurriok jarduera fisikoa eta osasuna sustatzeko programetarako izen-ematea ireki du

Mugiamurrioko “Bizi Zaitez Bizi” eta “55+ Bizitza Aktiboa Osasunerako” programetan izena emateko epea astelehenean irekiko da. Martxoko lehen astean hasi eta ekainaren erdialdean bukatuko diren bi programek jarduera fisikoa eta osasuna sustatzea dute helburu. Orientazio-zerbitzua Kultur Etxean ematen jarraituko da ostegunetan, 16:00etatik 18:00etara, eta ostiraletan, 11:00etatik 13:00etara, interesdunek aholkularitza jaso dezaten.

Mugiamurrio ekimenaren helburua udalerri aktiboa lortzea da. Horregatik “azaroan, Covid-19ak sortutako egoera eta erakundeek hartutako neurriak zirela eta, bertako zerbitzu batzuk egokitu behar izan ziren. Ohiko jardueren artean txango osasuntsuak bertan behera utzi behar izan ziren, eta osasun egoerak aukera ematen duen bezain laster ekingo zaie berriro”, azaldu du Txerra Molinuevo Amurrioko alkateak.

Jarduera fisikorako eta osasunerako programak

“Bizi Zaitez Bizi” saioa astelehenetan egingo da Nagusi Etxean eta 3 talde izango dira, 9:30ean, 10:30ean eta 11:30ean. Programa honen helburua Amurrioko adinekoen ongizatea, bizi-kalitatea eta garapen pertsonala sustatzea da. Saioetan zahartze aktiboari eta egokiari buruzko oinarrizko ezagutzak transmitituko dira, bizimodu aktiboa eta osasungarria sustatuko da eta jarduera funtzionala orekatzeko eta funtzionamendu emozionala, motibazionala eta soziala optimizatzeko estrategiak irakatsi eta entrenatuko dira.

Bestalde, “55+ Bizitza Aktiboa Osasunerako” programa asteazkenetan gauzatuko da, Reforren, eta 3 talde izango ditu, 9:30ean, 10:30ean eta 11:30ean. Jarduera honen bitartez, udalerriko 55 urtetik gorako biztanleen zahartze aktiboa eta osasungarria sustatu nahi da, ohitura osasungarriak irakastearen eta trebatzearen bidez, jarduera fisikoa, besteak beste. Jarduera funtzionala konpentsatzeko estrategiak eta motibaziozko funtzionamendua optimizatzeko estrategiak landuko dira, bizimodu aktiboa eta osasungarria lortzeko.

Izen-emateak

Bi programetarako izen-ematea otsailaren 15etik, astelehenetik, 26ra bitartean egin ahal izango da Mugiamurrioren bulegoan, Kultur Etxeko lehen solairuan, ostegunetan 16:00etatik 18:00etara, eta ostiraletan 10:30etik 12:30era. 619411732 telefono-zenbakira deituta ere eman ahal izango da izena.

Dauden plazak baino eskari handiagoa badago, irizpide hauek erabiliko dira parte-hartzaileak hautatzeko: lehenik, Jarduera Fisikorako Orientazio Zerbitzutik (SOAF) bideratutako pertsonak; ondoren, orain arte programen aurreko edizioetan parte hartu ez duten pertsonak, eta, azkenik, programen aurreko edizioetan parte hartu dutenak.

Orientazio-zerbitzua

Orientazio zerbitzuak Mugiamurrioren funtsezko pieza izaten jarraitzen du, eta normaltasunez egiten da Kultur Etxean, ostegunetan 16:00etatik 18:00etara, eta ostiraletan 11:00etatik 13:00etara, interesdunek aholkularitza jaso ahal izan dezaten. Orientazio zerbitzura joateko aldez aurretik hitzordua eskatu beharko da 619411732 telefono-zenbakira deituz edo mugiamurrio@gmail.com helbidera idatziz.

Amurriok 37 aparkaleku gehiago izango ditu Juan de Aranoa kalean

Amurriok aparkaleku-eremu berria izango du Juan de Aranoa kalean, eta 37 plaza izango ditu, horietako bat egokituta. 34.896 euroko inbertsioa eskatuko duten lanak datozen egunetan hastea aurreikusi dute, eguraldiak horretarako aukera ematen badu.

Jarduketa horrek Alkinar auzoak Udalarekin urtero egiten dituen bileretan egindako eskaeretako bati erantzuten dio. Eskaera horiek, auzotarren parte-hartzea bilatzen duten auzoetako batzarren programaren barruan daude. Juan de Aranoa kaleko aparkaleku berria leku estrategikoan egongo da, Iparraldeko tren geltokitik gertu dagoelako. Gainera, A-625 errepidetik datozen ibilgailuentzako disuasio-aparkaleku gisa ere pentsatuta dago, Araba eta Felix Murga kaleetako aparkalekuekin gertatzen den bezala.

Aparkaleku-eremu berria 912 m2-ko lursail batean eraikiko da, eta 37 plaza izango ditu, horietako bat egokituta. Lanak otsailaren hasieran hastea aurreikusten da, baina eguraldiak lanen hasiera baldintzatu dezake; izan ere, gutxienez astebete igaro behar da euririk egin gabe lanekin hasi aurretik. Lanek 4 aste iraungo dute, eta 34.896 euroko inbertsioa eskatuko dute.

 

Amurriok atzeratu egin du kintoen ohitura

Amurrioko kintoek ez irtetea erabaki dute, Covid-19ak sortutako egoera dela eta. 2003an jaiotako gazteek, hau da, 2021ean 18 urte betetzen dituztenek (aurten 75 inguru), otsailaren 4an, Santa Ageda egunaren bezperan, erronda ez egiteko erabakia hartu dute.

Udaleko arduradunekin hainbat koordinazio-bilera egin ostean, aurtengo kintoek jaieguna ekainaren 11ra aldatzea erabaki dute, betiere une horretan erakundeek hartutako neurriek horretarako aukera ematen badute. “Behin baino gehiagotan bildu gara kintoekin, hartutako neurriak betez tradizioa ospatzeko aukera baloratzeko, baina, azkenean, gazteek erabaki dute aukerarik onena eta arduratsuena Covid-19ak sortutako egoera hobea den beste egun batera atzeratzea dela. Udalak oso positibotzat jotzen du herriko gazteek erakutsitako erantzukizuna”, adierazi du Txerra Molinuevo Amurrioko alkateak.