Amurrioko Udalak asteburuan udaltzaingoaren aurka egindako pintadak gaitzetsi ditu

Amurrioko Udalak erabat gaitzesten ditu joan den asteburuan herriko Udaltzaingoaren egoitzaren fatxadan egindako pintadak.

Amurrioko Udaletik gaitzetsi egiten dugu udaltzainen aurkako indarkeria adierazpen hori, Amurrioko udal langileak diren aldetik. “Horrelako ekintzek ez dute lekurik gure herrian”, salatu du Txerra Molinuevo Amurrioko alkateak.

Era berean, Amurrioko Udalak horrelako ekintzak desagerraraztea eskatzen du, nahi dugun udalerri-ereduaren aurka doazelako, hau da, tolerantzian eta elkarbizitzan oinarritutako herria.

Amurrioko ekoizleek bat egin dute ‘Aiaraldea dendatik etxera’ ekimenarekin

Amurrioko ekoizleek bat egin dute Aiarako Kuadrillak Amurrioko eta Laudioko Udalekin batera diseinatutako ‘Aiaraldea dendatik Etxera’ ekimenarekin. Ekimen horren helburua herriko dendetan kontsumoa bultzatzea da. Horregatik, esperientzia horren bidez etxeetara eramango dira egindako eskaerak.

Guztira, gaur arte, ostiraletako merkatuko 6 ekoizlek egin dute bat ‘Aiaraldea dendatik Etxera’ ekimenarekin, Quesería Karobi, Quesos Aguiñiga, Burutxaga hestebeteak, Pasteleria Arantzazu, Lureder eta Ziorregi S.C., Amurrioko eta eskualdeko 0Km produktuaren kontsumoa sustatzeko beste pauso bat. Zabalik dago proiektu horren parte izateko izena emateko epea. Beraz, nahi dutenek bat egin ahal izango dute.

Horrela, herriko ekoizleek bat egin dute irailetik ‘Aiaraldea dendatik Etxera’ ekimenaren parte ziren herriko saltokiekin: Industrias cárnicas Burutxaga, Boga Boga arrandegia, Alberto Otegui arrandegia, Goxe Berri eta San José S.C. haragitegia.

Esperientzia pilotu honetan parte hartu nahi duten herritarrek webgune honetan online dagoen inprimakia bete beharko dute: https://docs.google.com/forms/d/e/1FAIpQLScR5kxcysdfK0ScI6I2rv_NQxXLdKGUuqieqPqu2-I3gB18Hw/viewform

Negozio bakoitzak adieraziko ditu eskaerak egiteko prozedura eta ordaintzeko moduak. Zerbitzu hori erabili ahal izateko, establezimendu bakoitzean gutxienez 10 euroko erosketa egin beharko da.

Banaketa horiek ez dute kosturik izango herritarrentzat, eta asteazkenetan eta ostiraletan egingo dira, 14:00etatik 16:00etara, eta ordu-tarte horren barruan noiz jaso nahi den eskaera aukeratu ahal izango da. Merkatuko ekoizleen kasuan, banaketa ostiraletan bakarrik egingo da.

 

Amurriok herriko saltoki, zerbitzu eta ostalaritza digitalizatzeko eta bultzatzeko udalerriko lehenengo Marketplace-a kaleratu du

Amurrioko Udalak, Izan Amurrio-Apymca merkatari elkarteak eta Rural Kutxak, COVID-19ak eragindako krisiaren ondorioz eta udalerriko enpresen egoera eta online salmenten hazkundea kontuan hartuta, hilabeteak daramatzate euren produktuak salgai jarri ahal izateko plataforma digital bat martxan jartzen.

Izan Amurrio-Apymcatik “aspaldi ikusi genuen gure udalerrirako online salmentarako marketplace edo plataforma bat sortzeko beharra; duela urtebetetik bizi den pandemiaren ondorioz, azkarrago egin dugu lan plataforma hori sustatzen. Gainera, guretzat elkartegintza indartzeko eta garatzeko aukera izan da”.

“Zure merkataritza gara, Amurrio” izenpean, guztira 37 establezimenduk osatzen dute plataforma hori. Online erakusleiho horrek udalerriko saltokien, zerbitzuen eta ostalaritzako lokalen eskura jartzen du establezimenduen digitalizazioa, https://www.somostucomercio.com/amurrio/comprar helbidearen bidez. Horrela, “Zure merkataritza gara, Amurrio” programak “hurbileko merkataritzaren izaera, nortasuna eta balioak bultzatu nahi ditu, baina denak atari beraren azpian edukitzeak ematen duen erraztasunarekin”.

Proiektuari bizirik eusteko asmoz, Amurrio Bideanek, Amurrioko Udaleko Tokiko Garapen Agentziak, pertsona bat kontratatu du tresna digital hori edukiz hornitzeko, erabiltzaileak prestatzeko eta plataforma eguneratuta izateko. Gainera, datozen hilabeteetan establezimendu gehiagok bat egiteko aukera egongo da.

Amurrioko Udala pozik agertu da proiektua martxan jarri izanagatik, “sektoreari tresna indartsua ematea eta Amurrioko dendak, zerbitzuak eta ostalaritza lehiakorragoak izatea dakarrelako. Gainera, bezeroek herriko dendetan erosketak egiteko beste bide bat izango dute”, adierazi du Txerra Molinuevo Amurrioko alkateak.

 

Bezeroentzako abantailak

Plataforma berri horren bidez, bezeroentzako aukerak askotarikoak dira. Produktua dendan jaso eta eskura ordaindu edo etxera bidali ahal izango da. Tokiko enpresa bat arduratuko da bidalketak udalerri berean eta eskualdean egiteaz. Probintzia barruko eta probintziarteko bidalketak egiteko enpresa bat ere badago.

Tresna erraz eta intuitiboa erabiliz, ordainketak ohiko bideak erabiliz (transferentziak, banku-txartelak edo paypal) egin ahal izango dira. Gainera, laster Bizumen bidez ere ordaindu ahal izateko lanean ari dira.

Proiektu horrekin bat egin nahi duten Amurrioko establezimenduek Izan Amurrio-Apymcarekin harremanetan jarri behar dute izanamurrio@apymca.com helbide elektronikora idatziz edo 945891200/670497108 telefono-zenbakietara deituz.

“Poetak Maiatzean” Nazioarteko Jaialdia Amurriora helduko da maiatzaren 7tik 18ra

Poetak Maiatzean” Nazioarteko Poesia Jaialdia Amurriora helduko da maiatzaren 7tik 18ra, poesia herritarren artean zabaltzeko asmoz. Edizio honetan, ‘Kristalezko orriak’ ekimena egingo da lehen aldiz Amurrion, 30 establezimendutan baino gehiagotan.

Amaurre ikastetxeko bigarren hezkuntzako laugarren mailako ikasleak, hainbat olerki zatirekin hasi dira gaur herriko saltokietako erakusleihoak apaintzen, eta baita beste eraikin batzuk ere, udaletxea eta Amurrio Antzokia besteak beste.

Herria apaindu ondoren, maiatzaren 18an nazioarteko poetak Amurrion elkartuko dira. Goizean, 12:00etan, bisita egingo dute Amaurre ikastetxera eta bertan topaketa bat izango dute ikasleekin. Arratsaldean, 18:00etan, La Casonako erakusketa aretoan, poeten eta herritarren arteko topaketa izango da. Bertan, olerkiak errezitatu eta euren bizipenak kontatuko dituzte. Amaitutakoan, trukea egingo da bertaratutakoekin.

Amurrioko herrilaguntzaileek on line gestioak egiten lagunduko diete adinekoei Nagusi Etxean maiatzeko astelehen guztietan

Amurrioko Udalak ekimen bat jarri du abian, udalerriko adinekoen artean gailu elektronikoen erabilera errazteko, hainbat kudeaketa egiteko eta zenbait aplikazio, Zoom edo Skype besteak beste, erabiltzeko. Aholkularitza herrilaguntzaileen bitartez emango da maiatzeko astelehenetan Nagusi Etxean.

Adinekoentzako aholkularitza, Osakidetzarekin (erizaina edo medikua) aldez aurretik hitzorduak eskatzeko, txertaketarako, Gizarte Segurantzarekin harremanetan jartzeko, errenta-aitorpenerako edo Lanbiderekin aritzeko laguntza ematera egongo da zuzenduta. Gainera, interesa duten pertsonentzat, Zoom, Skype edo Facetime bezalako aplikazioak erabiltzeko oinarrizko kontzeptuak ere azalduko dira.

Ekimenak “aipatutako gestioak zelan egin azaldu nahi die, eta egiten dituzten bitartean beraiekin egon. Aholkularitza hori behar duen pertsona bakoitzak bere gailu mugikorrean edo tabletean egingo du, eta hori ezinezkoa balitz, herrilaguntzaileak berak egingo luke Nagusi Etxeko ordenagailuan”, azaldu du Txerra Molinuevo Amurrioko alkateak.

Aholkularitza zerbitzua maiatzeko astelehen guztietan emango da, Adinekoen Kontseiluaren bulegoan. 10, 17 eta 24an 16:00etatik 18:00etara izango da, eta maiatzaren 31n 11:00etatik 13:00etara. Ez da aldez aurretik hitzordurik eskatu beharko, nahikoa izango da ezarritako ordutegian Nagusi Etxera joatea. Ekimen horri buruzko informazio gehiago nahi izanez gero, jarri harremanetan Amurrioko Udaleko herritarren partaidetzarako sailarekin, 945891161 telefono-zenbakira deituta.

 

Amurriok aparkaleku berria du Juan de Aranoa kalean

Amurriok amaitu ditu Juan de Aranoa kalean 37 plaza, horietako bat egokitua, dituen aparkaleku berria eraikitzeko lanak. Proiektua 912m2-ko lursail batean gauzatu da, eta 34.896 euroko inbertsioa eskatu du.

Aparkaleku berri hori leku estrategikoan dago, Iparraldeko tren geltokitik gertu. Gainera, A-625 errepidetik datozen ibilgailuentzako disuasio-aparkaleku gisa ere pentsatuta dago, Araba eta Felix Murga kaleetako aparkalekuekin gertatzen den bezala.

“Obra honen amaierak, udalerrian ibilgailuak aparkatzeko gune gehiago izatea eragin du, eta, gainera, dagoen zonalde estrategikoak garraio publikoaren irisgarritasuna hobetzea ahalbidetuko du, tren geltokiaren ondoan baitago”, azaldu du Txerra Molinuevo Amurrioko alkateak.

Aparkalekua eraikitzeak Alkinar auzoak urtero Udalarekin egiten dituen bileretan egindako eskaeretako bati erantzun dio. Eskaera horiek, auzokideen parte-hartzea bilatzen duten auzo-batzarren programaren barruan sartzen dira.

 

 

Liburu azoka instalatuko da Amurrion maiatzaren 5etik 9ra bitartean, Elexondo pasealekuan

Amurrioko Udalak eta Euskadiko Liburu Ganberak elkarlanean antolatutako Liburu Azoka egingo da aste honetan, maiatzaren 5etik 9ra, Amurrioko Elexondo pasealekuan, Juan Urrutia plazaren parean. 11:00etatik 14:00etara eta 16:30etik 20:30era bisitatu ahal izango diren 12 etxola izango ditu.

Azokan, euskal argitaletxeen eta disko-etxeen euskarazko eta gaztelaniazko azken nobedadeak aurkitu ahal izango dira. Azokaren helburua irakurketa bultzatzea da, izan ere, jarduera intelektual horrek abentura, intriga, fantasia, historia, erromantze eta beste hamaika gairen inguruko mundu ezberdinetarako ateak irekitzen dizkie adin guztietako pertsonei, eta aldi berean irakurlea beste garai eta leku batzuetara eramaten du.

Idazleen sinadurak

Antolatzaileek baieztatu dutenez, asteburuan zehar idazleak liburuak sinatzera hurbiltzea aurreikusten da. “Oraindik ezin dugu eguna eta ordua zehaztu, baina Jose Luis Urrutia, Inma Roiz, Miren Palacios eta bertako idazleen presentzia aurreikusten da”, adierazi du Asier Muniategik. Gainera, azokako standetako batek “Umorea Euskal literaturan” erakusketa hartuko du.

Azokak osasun agintariek ezarritako segurtasun neurri guztiak beteko ditu. Bestalde, herritarrei arduraz jokatzeko, azokako standak bisitatzerakoan segurtasun-tartea gordetzeko eta gel desinfektatzailea erabiltzeko eskatu zaie.

 

Amurrioko Udalak eta Sartu-Arabak, udalerriko langabetuen gizarteratzea sustatzeko lankidetza-hitzarmena sinatu dute

Amurrioko Udalak eta Sartu-Araba Gizarteratze Elkarteak lankidetza-hitzarmen bat sinatu dute, eta, horren bidez, enplegu- eta prestakuntza-programa bi jarriko dira abian: “Erabilera publikoko naturguneak eta hiri-guneak mantentzeko laguntzailea” eta “Herri laguntzaileak”. Horretarako, Udalak 194.000 euro bideratuko ditu Sartu-Araba elkartera proiektua aurrera eramateko. Izena emateko epea maiatzaren 3tik 13ra luzatuko da.

Bi erakundeen arteko akordioak parte-hartzaileak lan-munduan sartzea erraztea bilatzen du, eta udalerriko 13 langabetu, mantentze-lanetako 10 laguntzaile eta 3 herri laguntzaile, kontratatzea ahalbidetuko du. Lanaldi partzialeko kontratuak sei hilabetekoak izango dira.

Enplegu-programetan parte hartu nahi duten pertsonek Amurrion erroldatuta egon beharko dute, gutxienez lau urteko antzinatasunarekin, eta LANBIDEn langabe gisa inskribatuta. Mantentze-lanetako laguntzaileen programaren kasuan, azken 18 hilabeteetan langabezian urtebete egon diren pertsonak kontratatzea lehenetsiko da. Gainera, programa horretarako, eraikuntza, industria, garbiketa edo ingurumen sektoreetan gutxienez urtebeteko lan-esperientzia izatea baloratuko da, eta azken 3 urteetan antzeko programa batean parte hartu ez izana.

Herri laguntzaileei dagokienez, beharrezkoa izango da herritarrekin komunikatzeko euskara-maila nahikoa izatea eta ofimatikako ezagutzak izatea, eta baita jendearekin harremana eskatzen duten lanetan sei hilabeteko esperientzia izatea ere. Gidabaimena eta ibilgailua izatea ere baloratuko da.

Izen-emateak lanbide.net webgunean edo Lanbide-Euskal Enplegu Zerbitzuaren Amurrioko bulegoan argitaratutako eskaintzan egingo dira. Izena emateko epea amaitutakoan, eskainitako plazak baino eskatzaile gehiago egonez gero, hautaketa-prozesu bat egingo da.

 

 

 

 

 

Amurrioko Udalak pasabide bat du udal zergak ordaintzeko

Amurrioko Udalak beste pauso bat eman du administrazio elektronikoaren sisteman sartzeko. Horretarako, aldizkako udal-zerga guztien ordainketa erraztu du, ordainketarako pasabide baten bidez. Pasabide horrek ordainketa erraztuko du, eta gestioa erosoagoa bilakatuko du herritarrentzat.

Gainera, hemendik aurrera, edozein banketxetako txartelarekin egin ahal izango da ordainketa, TPV aukera markatuta. Lehen Kutxabankekin eta Laboral Kutxarekin baino ezin zen egin. Udalak hartuko ditu bere gain kudeaketa horren ondoriozko gastuak.

“Ordainketarako pasabidea, zenbait tasa eta zerga ordaintzeko lehendik ere bazegoen tresna da, baina orain, zergadunei kudeaketa errazteko helburuarekin, zerga-erroldaren bitartez izapidetzen diren tasa guztiak sartu dira. Modu azkarra eta segurua da, eta kreditu txartel baten bidez egin daiteke etxetik”, azaldu du Txerra Molinuevo Amurrioko alkateak.

Hemendik aurrera, ordainketarako pasabideak zergak, tasak eta trafikoko isunak ordaintzea ahalbidetuko du. Zehazki, Ondasun Higiezinen gaineko Zerga (OHZ-IBI), Jarduera Ekonomikoen gaineko Zerga (JEZ-IAE) eta Trakzio Mekanikoko Ibilgailuen gaineko Zerga (TMIZ-IVTM); hilerrien, larreen, zaborraren, luberritzearen, idazkunen, San Antongo merkatuaren, ibien eta mahaiekin eta aulkiekin okupatzearen gaineko tasak; eta trafikoko isunak.

Zerbitzu horretara sartzeko, ordainketarako pasabide bat dago Udalaren webgunean (www.amurrio.eus), “Nire ordainketa” fitxan. Zergak ordaintzeko, ordainagirian agertzen den CPR izenekoa aukeratu beharko da, eta eskatutako datuak eman beharko dira. Bete ondoren, finantza-erakundea aukeratu eta txartelaren datuak sartu beharko dira.

 

Jarraibideak

Herritarrei gogorarazten diegu udal-arautegiak zenbait hobari ezartzen dituela ondasun higiezinen gaineko zergan

Udal-arautegiak OHZn (ondasun higiezinen gaineko zerga) hobari batzuk ezartzen ditu, esate baterako hauentzat: Administrazio Batzarretako batean kokatutako etxebizitzentzat, landa-lursailentzat eta familia ugarien titularrentzat. Hurrengo laukian azalduta daude zehaztasun handiagoz. Hobariak haien artean bateraezinak izango dira eta interesdunak eskatuta emango dira. Eskaeraren hurrengo ekitaldian aplikatuko dira. OHZ, aldiro-aldiro kobratzen diren gainontzeko zergen moduan, nahierako ordainketa-sistemaren (SEP) barnean sar daiteke.

OHZren (ondasun higiezinen gaineko zerga) HOBARIAK

  • Aloria, Artomaña, Baranbio, Delika, Larrinbe, Lekamaña, Lezama, Saratxo edo Tertangako Administrazio Batzarrean dauden etxebizitzak, baldin eta titularrak bertan erroldatuta badaude: % 50.
  • Naturgune babestuetan kokatutako landa-lursailak, basoa edo plantazioak badituzte: % 95.
  • Familia ugarien titularrak, familia-egoitza diren higiezinen kasuan: hobarien ehunekoa familiaren diru-sarreren araberakoa izango da.
  • Pertsonen ohiko bizileku diren etxebizitzak, honako errenta hauek baino baxuagoak badituzte:

a) Urtean 10.296 euro, subjektu pasiboa soilik bizi bada etxebizitzan eta familia-unitateko parte bada.

b) Urtean 15.444 euro, etxebizitzan bi pertsona bizi badira edo familia-unitateak bi kide baditu.

c) Urtean 21.000 euro, etxebizitzan bi pertsona baino gehiago bizi badira edo familia-unitateak bi kide baino gehiago baditu.

Ezinbesteko baldintza izango da familia-unitateko edo etxebizitzan bizi den kideetako inork ez izatea beste etxebizitzarik Euskal Autonomia Erkidegoan.

Hobaria % 99koa izango da.

  • Etxebizitza Hutsen Programaren esparruan lagatzen diren ondasun higiezinak: % 10.
  • Autokontsumorako eguzki-energia edo beste energia berriztagarriren batengandik eratorritako aprobetxamendu termiko eta elektrikoko sistema berriak instalatuta dituzten etxebizitzak. Hobariaren ehunekoa errentaren araberakoa izango da.

zerbitzu-ekonomikoen-izapideak