Amurrioko Udalak herritarrei dei egiten die guztion artean udalerri garbiago bat lor dezagun

Administrazioak, enpresek, saltokiek, ikastetxeek eta herritarrek batera egin beharreko lana da

Amurrioko Udalak herritarrei dei egiten die guztion artean udalerri garbiago bat lor dezagun.

Amurrioko Udalak herritarrei dei egiten die guztion artean udalerri garbiago bat lor dezagun.

Ez da egiteko erraza, baina guztiok batera egin behar dugu, eta beharrezkoa da sektore guztiek parte hartzea (administrazioak, zerbitzua ematen duten enpresak, industriak, saltokiak, ikastetxeak eta herritarrak), bakoitzak duen erantzukizuna kontuan hartuta. 2021ean, administrazioan egitekoaren gure zatia beteko dugu, eta guztion erantzukizunari egiten diogu dei, bakoitzak bere zatia bete dezan. GUZTIOK IRABAZTEN BADUGU, ZUK ERE IRABAZIKO DUZU!

ZER EGIN DEZAKEGU UDALERRI GARBI ETA ARDURATSU BATEN ALDE?

Administrazioak:

–              Kalitatezko zerbitzua ematea bermatu, eraginkorra eta bilketa- eta garbiketa-maiztasun egokiekin.

–              Ematen diren zerbitzuak eta horien erabilera-baldintzak behar bezala arautu eta finantzatzen dituzten ordenantzak idatzi, onetsi eta bete.

–              Zerbitzuak gehitu eta momentuko hainbat beharretara egokitu.

–              Europar Batasunak ezarritako helburuak betetzeko lan egin: 2025. urterako hondakinen % 65 birziklatu, sentsibilizazio-kanpainak egin, bosgarren edukiontziaren hedatze osoa, etab.

Zerbitzua ematen duten enpresek:

–              Kalitatezko zerbitzua ematea bermatu, eraginkorra eta bilketa- eta garbiketa-maiztasun egokiekin, administrazioarekin sinatutako kontratuen arabera.

Industriek:

–              Ekonomia zirkularra gauzatzen denean sortzen diren hondakinak murriztu, produkzio-prozesuan berriz sartu, ekodiseinua, etab.

–              Indarrean dagoen legeriak adierazten duen moduan, bakoitzaren produkzio-prozesuan sortutako hondakinen kudeaketa bere gain hartu.

–              Dauden enbalajeen hondakinen bilketaren, atez ateko bilketaren eta gainerakoen zerbitzu espezifikoak erabili.

–              Gainerako herritarren moduan sortzen dituzten eta hiri hondakinen barnean sar daitezken hondakinen kudeaketarako udal-zerbitzuak behar bezala erabili.

Saltokiek:

–              Indarrean dagoen legeriak adierazten duen moduan, bakoitzaren produkzio-prozesuan sortutako hondakinen kudeaketa saltokiaren gain hartu.

–              Dauden enbalajeen hondakinen bilketaren, atez ateko bilketaren eta gainerakoen zerbitzu espezifikoak erabili.

–              Gainerako herritarren moduan sortzen dituzten eta hiri hondakinen barnean sar daitezken hondakinen kudeaketarako udal-zerbitzuak behar bezala erabili.

Hezkuntza-zentroek:

–              Eskolako Agenda 2030 programaren bidez, etorkizuneko belaunaldiak iraunkortasunean hezi; aurten, klima babesteko ekintza landuko da.

–              Sortzen diren hondakinak banatu, ondoren ikasleen parte-hartze aktiboarekin birziklatzeko.

–              Konpostajea egin, modu organikoan birziklatu eta hondakinak alferrik galtzearen aurka lan egin.

–              Kontsumo iraunkorra, trukea, berrerabiltzea eta hondakinen birziklatzea sustatu.

Herritarrek:

–              Sortzen diren hondakinak murriztu, zero hondakinaren biderantz.

–              Modu arduratsuan kontsumitu, enbalajeak murriztu eta bigarren bizitza bat eman hondakinei berrerabiltzearen bidez.

–              Etxean sortutako hondakinak behar bezala banatu eta dagokion edukiontzian jarri.

  • Urdina: papera eta kartoia.
  • Horia: ontzi arinak.
  • Berdea: beirazko ontziak.
  • Marroia: materia organikoa.
  • Grisa: errefusa.
  • Laranja: etxeko olioa.
  • Zuria: arropa, zapatak, liburuak, etab.
  • Garbigune txikia: pilak, CDak, tinta-kartutxoak, gailu elektroniko txikiak eta bestelakoak.

–              Gogoan izan maskoten gorotzak biltzea.

  • Kalean hondakinak uzteak zigorrak ezartzea ekar dezake.

–              Debekatuta dago edukiontzietatik kanpo edozein motatako hondakinak kalean uztea, baita bilketa-egunetik kanpo tamaina handiko hondakinak eta bestelakoak uztea ere.

  • Tamaina handiko hondakinak biltzeko zerbitzua ostiralero ematen da. Aldez aurretik eskatu behar da edozein hondakin biltzeko, 900 101 476 telefonora deituta edota Línea verde aplikazioaren bidez. Abisua eman ondoren, ostegun arratsalde-gauean etxetik hurbilen dagoen edukiontziaren ondoan jarri hondakinak.
  • Garbigune-zerbitzu bat dago, eta bertan hondakinak utzi daitezke, 10:00etatik 14:00etara eta 15:00etatik 18:00etara, Larrabe auzoko hilerriaren ondoan.
  • Edukiontziak gaizki erabiltzeak eta hondakinak edukiontzietatik kanpo eta bilketa-egunetatik kanpo uzteak zigorrak ezartzea ekar dezake.

ReforAmurrio Enpresaldea hazitegian eta enpresa-zentroan sartzeko deialdi berria

Abenduaren 1etik 29ra bitartean zabalik egongo da eskabideak aurkezteko epea

 

Lokalak zerbitzu-sektorean (“bulegoak”) lan egiten duten edo egingo duten enpresa edo pertsona sustatzaileentzat dira.

Hazitegiaren eta enpresa-zentroaren kasuan, modulu edo bulego bakoitzaren alokairu-prezioan sartuta daude alokatutako lokal bakoitzaren kontsumoak eragindako gastuak, hala nola elektrizitatea, Interneterako konexioa, berogailua, garbiketa, etab., baita zerbitzu komun batzuk ere; harrera, officea, postontzi pribatua, lokalen mantentze-lanak, segurtasun-sistema, bilera-gelak, etab.

Eskabidea aurkezteko unean jarduerari alta eman zitzaionetik hiru urte baino gutxiago daramatzaten enpresa edo pertsona sustatzaileek hobaria dute dagoeneko finkatuta dauden enpresen aldean.

Gainera, hobari gehigarriak aplikatzen dira enplegua sortzeagatik (% 20tik% 37ra) eta garatu beharreko jarduera berritzailetzat jotzen bada (% 10-% 25), betiere moduluak 25m2 gainditzen baditu. Bi hobari-ehunekoak bateragarriak dira, betiere % 50 gainditzen ez bada.

Une honetan, 10,36m2 eta 34,66 m2 bitarteko lau modulu libre daude.

COVID-19k eragindako egungo egoera kontuan hartuta, jarduketa-protokolo bat jarri da abian instalazioen erabiltzaile diren pertsonen eta enpresen segurtasuna bermatzeko, osasun-agintarien eta Eusko Jaurlaritzaren gomendioei jarraikiz.

Interesa duten pertsona eta enpresa guztiek informazioa kontsultatu edo zabaldu dezakete Amurrio Bideanen (El Refor Kalea sn) Tel.: 945 891721. E-mail administracion@amurriobidean.org

www.amurriobidean.org

 

Argitaratu da +65 Nagusiak Aurrera aldizkari berriaren lehen alea

Amurrioko Adinekoen Batzordearen argitalpena da

+65 Nagusiak Aurrera Amurrioko Adinekoen Batzordearen aldizkaria da, eta abenduan lehen alea argitaratuko da, Amurrioko Udalak editatuta. Hasieran 300 ale argitaratuko dira, eta irakurri nahi dutenek udaletxean, Kultur Etxean, liburutegian eta Nagusin (irekita dagoenean) lortu dezakete, baita administrazio-batzarren gizarte-zentroetan ere. Gainera, herri-laguntzaileek aldizkaria adinekoei banatuko diete ostiraletan.

+65 Nagusiak Aurrera aldizkariaren helburua da informatzea, entretenitzea, irakurketa-ohiturak sortzea eta bizitza osasuntsua sustatzea, baita “adinekook gizarte honetan ditugun gizarte-arazoetara hurbiltzea, gizarte horren alde borrokatu baikara beti hobetzeko asmoarekin. Gure aldizkaria heldu da zuregana, eta haren xedea da informazio-, aisialdi-, kultura-, umore- eta ezagutza-prozesu bat sortzea oro har gizarteari eta bereziki adinekoei eragiten dieten arazo larrien inguruan, gozatzeko, ondo pasatzeko eta ahalik eta probetxurik handiena ateratzeko”, adierazi du Amurrioko Adinekoen Batzordeak. Hamabi orrialde koloredun ditu, honako atal finko hauekin: bizitza aktibo eta osasuntsua, euskara, gizarte-zerbitzuen aholkularitza, elkarrizketa, nire txoko gustukoena, entretenimenduak, aisialdia eta denbora librea, Nagusiren programazioa eta Amurrioko monumentu-ondareari buruzko kontrazala. Oraindik ez da periodikotasuna zehaztu, lehen esperientzia pilotu honen arabera finkatuko da; proiektuak Batzordearen zalantzak aztertu nahi ditu, eta irekita dago Amurrioko edozein adinekoren parte-hartzeari begira.

Amurrio 2020 Erakusketa Filateliko numismatikoa azaroaren 14an inauguratuko da La Casona aretoan

Aurten, behin‑behineko posta‑bulegoko zigilu‑markak Juan de Urrutia Zuluetaren irudia darama.

Aurten ere urteko Amurrioko Erakusketa Filateliko‑numismatikoa iritsiko da La Casona erakusketa‑aretora, zeina COVID‑19aren pandemiaren aurkako segurtasun arauak betetzeko egokitu den. Herriko Asociación Cultural Filatélica Numismática Armuru elkartearen eskutik izango da, eta azaroaren 14an ireki eta 28ra arte egongo da zabalik. Honako hau da bisitetarako ordutegia: asteartetik ostiralera, 10:00etatik 13:00etara eta 17:00etatik 19:00etara; eta larunbat, igande eta jaiegunetan, 10:00etatik 14:00etara. Aurten, oso lagin zabala egongo da: pezeta‑txanponak, euroak, zirkulazioan daudenak, tematikoak, zibilizazioak, lanbideak, eta Estatuko eta Euskadiko billeteak. Horrez gain, zirkulazioan egon ez diren txanponak eta ontzak egongo dira, baita kasinoko fitxak eta kooperatibetako txapak ere.

Azaroaren 17an, asteartean, behin‑behineko posta‑bulegoa irekita egongo da 17:00etatik 19:00etara. Edizio honetan, Juan de Urrutia Zulueta amurrioarraren irudia duten zigilu‑markak izango ditugu; Juan de Urrutia Zuluetaren estatua izen hori bera duen plazan dago. Bestalde, Filatelia atalean Gurutze Gorria gai duten zigiluen bost koadro eta Amurrioren posta‑marka bi egongo dira. Egun horietan, gainera, bi hitzaldi daude aurreikusita: lehena, hilabete bereko 18an, asteazkenean, arratsaldeko 18:30ean, zigiluei buruzkoa; eta, bigarrena, hurrengo egunean, azaroaren 19an, txanponen ingurukoa. Aretoan, beste edizio batzuetan bezala, “Jakintza numismatikoa” lehiaketa ospatuko da. Helburua jakin‑mina sortzea da. “Erakusketa bisitatzen duten gazteek numismatikan interesa izan dezaten nahi dugu, eta, hala, belaunaldi aldaketa sustatzea”, adierazi du elkarteak.

“JAKINTZA NUMISMATIKOA” LEHIAKETA

* Munduko txanponen eta billeteei buruzko galdera‑lehiaketa da.

* Normalean, fitxa batean erantzun beharreko hiru galdera daude: Zein kontinentetakoa da billete hau? Zein herrialdetakoa da txanpon hau? eta, Zer irudikatzen da (animalien mundua, kulturala, etab.)?

* Opari gisa, egungo eta iraganeko munduko txanponak emango dira.

* Fitxan honako datu hauek idatzi behar dira: lehiakidearen izena, helbidea eta telefono-zenbakia.

 

 

Udazken honetan ospatuko da Liburu Azoka Amurrion, azaroaren 12tik 15era, Elexondo pasealekuan, Juan Urrutia plazaren parean

Aurreko edizioetan, gure herrian gehien eskatu ziren gaiak mikologia, gastronomia, botanika eta historia izan ziren.

Amurriok urtero  udaberrian ospatu ohi du Liburu Azoka; baina, urte berezi honetan, udazkenera atzeratu behar izan dugu. Pandemiak eragindako egoerak ahalbidetzen badu, hasiera batean, ospakizuna azaroaren 12tik 15era bitartean egingo dugu. Elexondo pasealekuan kokatuko da, Juan Urrutia plazaren parean, eta 11:00etatik 14:00etara eta 16:30etik 20:30era irekita egongo diren 14 postuk osatuko dute azoka. Bertan, euskara eta gaztelaniazko argitaletxeen zein diskoetxe euskaldunen azken berritasunak izango ditugu % 10eko beherapenarekin, eta salgai‑hondarren atal bat ere egongo da. Azoka hau Euskadiko Liburuaren Ganbarak antolatzen du bertako Udalaren laguntzarekin, eta horren helburua da irakurketa sustatzea; izan ere, jarduera intelektual honek adin guztietako jendeari ateak irekitzen dizkio abentura, intriga, fantasia, historia, amodioa eta amaigabeko munduetara, eta, aldi berean, irakurlea beste garai eta leku batzuetara eramaten du.

Euskadiko Liburuaren Ganbararako azoken urteko kanpainaren koordinatzaile Asier Muniategik adierazi du gehien irakurtzen diren berritasunak Toti Martínez de Lezea, Jon Arretxe, Candela Jaio, Elvira Lindo, Isabel Allende eta Ken Follett autoreenak direla. Muniategik adierazi du, aurreko edizioetako esperientziaren arabera, “Amurrion gehien eskatzen diren gaiak mikologia, gastronomia, botanika eta historia direla, eta bidaia‑liburu eta haur eta gazteentzako liburuak irakurtzen dituen jende asko ere badagoela”. Aurten, gainera, 1920ko hamarkadako euskal literaturaren erakusketa bat egongo da.

Idazleek liburuak sinatzea

Asteburuan, Muniategik aurreratu duenez, espero da idazleak etortzea liburuak sinatzera. “Oraindik ezin ditugu ordua eta eguna zehaztu, baina etortzekoak dira Inma Roiz eta Miren Palacios idazle arabarrak eta José Javier Abaloso eta José Luis Urrutia idazleak ere. Horiek azokara etorri eta liburuak sinatuko dizkiete hala eskatzen duten herritarrei”. Halaber, herritarrei arduratsuak izateko eskatu die, segurtasun‑distantzia mantentzeko eta desinfektatzeko gela erabiltzeko. “Orain arte berrantolatutako azoka guztietan jokabidea errespetuzkoa eta adeitsua izan da, eta horrela jarraitzeko asmoa dugu”, amaitu du Muniategik.

Online ikastaroak eskaintzen dira etxeko konpostajearen inguruko prestakuntza emateko eta etxeko konpostagailu bat egiten irakasteko

Azaroaren 18a baino lehenago eman beharko da izena.

Amurrioko bizilagunek konpostajeari eta gaikako bilketari buruzko online ikastaroetan eta mintegietan parte hartu ahal izango dute. Horiek Aiarako Kuadrillak antolatu ditu Hondakinak Prebenitzeko eta Birziklatzeko Europako Astea dela eta. Ekimen hau “Etekin atera zure hondar organikoetatik” lelopean gauzatuko da.

Konkretuki, bi online saio emango dira. Horietako bat, “Etxeko konpostajeari buruzko oinarrizko prestakuntza” izenekoa, azaroaren 20an (ostirala) izango da, 18:00etan.

Bigarren saioa, berriz, “Konpostagailu bat etxean nola egin eta lortutako konposta nola erabili”, azaroaren 27an (ostirala) izango da, 18:00etan. Halaber, dibulgazio‑saio bat ere emango da, euskaraz, eskoletan zuzenean, azaroaren 27an, “Hondakinak eta gaikako bilketa” gaiaren inguruan.

Interesdunek, parte hartzeko, azaroaren 18a baino lehenago eman beharko dute izena. Horretarako, mezu elektroniko bat bidali beharko dute aiaraldea.konposta@gmail.com helbidera interesatzen zaizkien saioak adierazita. Azaroaren 20ko saioan parte hartuko dutenen artean 25 konpostagailu eta 25 aireztagailu zozkatuko dira. Geroago, Aiarako Kuadrillako YouTube kanal berrian ikusi ahal izango dira saio horiek eta Aiarako Kuadrillaren webgunean konpostajeari buruzko eskuliburu berria jarriko da nahi duenak deskargatzeko.

Konpostagailuen sarea

Aldi berean, Aiaraldeko Konpostagailuen Sareari atxikitako familien jarraipena egingo da. Horretarako, berrogei bat bisita edota elkarrizketa egingo dira sareari atxikitako familien artean.

AZAROAREN 17tik 26ra LAU ONLINE IKASTARO EMANGO DIRA, ESKUALDEKO EKINTZAILEEI ETA ENPRESA TXIKIEI ZUZENDUTAKOAK

VITAL Fundazioak, Aiarako Kuadrillaren bidez, diruz laguntzen ditu ikastaro horiek, enpresa-proiektu berriak abian jartzea eta duela gutxi sortutako enpresak finkatzea errazteko helburuarekin.

Ikusirik ekintzaileen artean harrera ona izan dutela prestakuntza “bizkor” horren aurreko edizioek, eta gero eta eskari handiagoa dagoela, eskualdeko udalek beste lau ikastaro antolatu dituzte elkarrekin, “ekintzailetza-pilulak” direlako formulan oinarrituta.

COVID-19ak sortutako egoera aintzat hartuta, erabaki da ikastaroak online emango direla.

Ikastaroek lau orduko iraupena izango dute eta helburu nagusia da oinarrizko ezagutzak eskaintzea enpresa-ekimen berri bat abiaraztean edo negozio edo enpresa txiki bat kudeatzean zailtasun gehien ekartzen dituzten enpresa-kudeaketako arloetan (komertzialak, finantzarioak, fiskalak, etab.).

Saioetako bakoitzean, tartetxo bat egongo da bertaratutakoek zalantzak argitzeko edo giro lasaian bere esperientziei buruz hitz egiteko. Aurretiaz egindako ikastaroetan ikusi dugunaren arabera, ekarpen horiek prestakuntzaren emaitza asko hobetzen dute.

Informazio gehiagorako eta ikastaro guztietan edo horietako batean izena emateko, jarri harremanetan Amurrio Bidean elkartearekin 945891721 telefonoaren bidez edo autoempleo@amurriobidean.org helbide elektronikoaren bidez.

 

TALLERES EMPRENDIZAJE.EUS

 

Amurrioko Udalaren Bitartekaritza eta Bizikidetza Zerbitzuak jendaurreko arreta ematen du astelehen eta asteazkenetan Kultur Etxean, aurretiko hitzorduarekin

Ikasturte berria hastearekin batera, Kultur Etxeko lehenengo solairuan Amurrioko Udalak eskaintzen duen Bitartekaritza eta Bizikidetza Zerbitzuak jendaurreko arreta-ordutegi berria izango du. Astelehenetan arreta-ordutegia 08:30ean hasi eta 17:00etan amaituko da eta asteazkenetan 08:30ean hasi eta 14:30ean amaituko da. Aurretiko hitzordua 654176548 telefonoan eskatu beharko da eta arreta euskaraz zein gaztelaniaz emango da. Zerbitzu honen helburua da udalerriko herritarren bizikidetza hobetzea, elkarrizketa eta parte-hartzea gatazkak konpontzeko modu gisa erabiltzearen bitartez. Programa honen xede nagusia da herritarrentzako arreta-zerbitzu bat eskaintzea, dituzten gatazkak modu zibilizatuan lantzeko, epaiketa ekiditen saiatzeko. Era berean, sentsibilizazio eta parte-hartze kanpainak garatu nahi dira auzo, ikastetxe eta gazteen lonjetan. Kanpaina horiek doakoak izango dira udalerriko biztanle guztientzat.

Ekintza eta jarduera horiek Amurrioko Bizikidetza Plan Integralean sartuta egongo dira 2019ko urria eta 2020ko iraila bitartean, eta bi ardatz nagusi ezarri dira: Gatazkak Kudeatzeko Zerbitzua: bizikidetza sustatzeko ekintzak eta jarduera espezifikoak. Aintzat hartuta aipatutako epean zehar munduko pandemia, konfinamendua, eguneroko jarduerak egiteko mugak eta abar egon direla, logikoki, hasierako lan-plana aldatu egin da. Proiektuaren xedea izan da Amurrioko Bizikidetza Plan Integralarekin jarraitzea eta duela urte batzuk hasi genuen lanarekin jarraitzea. Gatazkak kudeatzeko zerbitzua Amurrio udalerrian bizi diren pertsona guztiei zuzendutakoa da, berdin du udalerrian beren ekintza profesionala gauzatzen duten edo ez edo horretan zenbat denbora daramaten. Gatazkaren batek kaltetzen baditu, auzokoen artekoa bada edo zerbitzuak hartzen dituenekoa bada, zerbitzura jo dezakete. Bizikidetza sustatzeko jarduerei dagokionez, ikastetxeekin, herritarren arretarako bulegoarekin eta nagusien zentroarekin lankidetzan aritu da. Era berean, gazteen lonjetan jarduera espezifikoak gauzatzen dira.

AIARAKO KUADRILLAKO ENPRESA ETA NEGOZIO TXIKIEI ZUZENDUTAKO ARGAZKILARITZA-IKASTAROA: SARE SOZIALETARAKO ETA E-COMMERCERAKO PRODUKTUAREN ARGAZKIAK EGITEA SMARTPHONEAREKIN

Azaroaren 10 eta 12an egingo da, 14:30etik 16:30era, ReforAmurrio Enpresaldean.

Gaur egun, marketin digitala tresna gakoa da enpresa eta negozio txikiak zuzenean beren bezeroekin harremanetan jartzeko. Marketin digitala, sare sozialak zein e-commerce delakoa gakoak dira gaur egun bezeroa izan daitekeen edozeinen atentzioa erakartzeko eta salmentak egi bihurtzeko. Egoera honetan, ezinbestekoa da eduki dinamikoak, erakargarriak, eta, batez ere, bisualak, sortzea.

“Irudi batek mila hitz baino gehiago balio du” esaldia dogma bat da arloko profesionalentzat. Hori dela eta, ikastaro honen helburua da bertaratutakoei oinarrizko jakintza eta tresnak ematea, kalitatezko eduki bisualak sortzen ikasteko edo horien sorkuntzan hobetzeko, xede duten publikoarekin konektatzeko, horri emozioak eragiteko eta, azken finean, erostera bultzatzeko. Negozio bakoitzarentzako eduki-estrategia bat landuko da, zer, nola eta zergatik argitaratuko den aintzat hartuta. Halaber, argazkiak egin eta irudiak editatu, esportatu eta abar egiteko doako aplikazio sinple bat erabiltzen irakatsiko dugu, eta kolorearen, argiaren doikuntzen eta beste elementu askoren garrantzia azpimarratuko dugu. Horrenbestez, bertaratutako pertsonek smartphonea eraman beharko dute ikasitakoa ariketa zehatzen bidez praktikara eramateko.

Aintzat hartuta COVID-19a dela-eta ezarritako protokoloa, 8 leku egongo dira bakarrik.

Ikastaroa Vital Fundazioak lagundu du diruz, Aiarako Kuadrillaren bidez.

Informazio gehiagorako edo izena emateko, jarri harremanetan Amurrio Bidean elkartearekin 945891721 telefonoaren bidez edo autoempleo@amurriobidean.org helbide elektronikoaren bidez.

Argazkilaritza_Tailerra_Smarphonearekin

Amurriok Mikoturismo Egunen XVII. edizioa ospatuko du urriaren 17tik azaroaren 1era

Ostalaritzako 9 establezimenduk hartuko dute parte larunbat honetan, urriaren 17an, hasiko den eta hiru asteburu luzatuko den perretxikoekin egindako pintxoen XV. Lehiaketan; Abiaga eta Bideko jatetxeek garaiko perretxikoekin egindako menu gastronomikoak eskainiko dituzte.

Urriaren 31n perretxikoak sailkatzeko ohiko jardunaldia egingo da Arriola Elkarte Mikologikoaren eskutik. Hurrengo egunean erakusketa bisitatu ahal izango da udal pilotalekuan.

Perretxikoak biltzeko garai egokiena heldu den honetan, Amurrioko udalak, Mikoturismo Egunak jarduera antolatu du beste urte batez. Hiru asteburutan perretxikoak izango dira protagonista nagusiak XV. Pintxo Lehiaketan parte hartuko duten ostalaritzako 9 establezimenduetan. Horrez gain, perretxikoen sailkapenerako eta erakusketarako jardunaldiak egingo dira udal pilotalekuan. Jarduera biak, Covid-19aren hedapenari eusteko hartu diren higiene eta osasun neurriak betez egingo dira.

Pintxo lehiaketa

Perretxikoekin egindako pintxoen XV. Lehiaketan ostalaritzako 9 establezimendu hauek hartuko dute parte: Alanbike, Albizabal, Atxubi, Batzokia, El Crucero, El Rinconcito, Guk, Frontón Taberna eta Txoko Gorri. Lehiaketak bi sari banatuko ditu, epaimahaiak aukeratutako pintxorik onena, 200 euro eta plaka bat jasoko dituena eta, herritarren bozketaren bitartez aukeratutako pintxorik onena, 150 euro eta plaka bat jasoko dituena.

Herritarren aukeraketan parte hartu ahal izateko gutxienez 8 pintxo dastatu beharko dira. Boto-paperak azaroaren 2ra arte sartu ahal izango dira Kultur Etxean eta Udaletxean egongo diren hautestontzietan, eta azaroaren 1ean udal pilotalekuan. Horrez gain, bozketan parte hartzen dutenen artean 275 euroko bi sari zozketatuko dira.

Gastronomia esparruan, pintxo dastaketez gain, Abiaga eta Bideko jatetxeek denboraldiko perretxikoekin egindako bi menu eskainiko dituzte.

Perretxikoen sailkapena eta erakusketa

XVII. Mikoturismo Egunak ekimenaren barruan egongo den perretxikoak sailkatzeko ohiko jardunaldia urriaren 31n izango da udal pilotalekuan, 18:00etatik aurrera. Alberto Villanueva mikologoa, Arriola Elkarte Mikologikoaren kolaboratzailea, perretxikoen sailkapena egiten arituko da bi orduz. Jarduera horretan interesatuta dagoen edozein pertsonak hartu ahal izango du parte, ikusle gisa, zalantzak kontsultatuz, edo bildutako espezieak sailkatzeko eramanez.

Perretxiko erakusketa azaroaren 1ean izango da, udal pilotalekuan, 11:00etatik 14:00etara.

Jarduera seguruak

Jarduera horiek gauzatu ahal izateko, Amurrioko Udalak jarduerak modu seguruan gauzatzeko beharrezkoak diren higiene eta osasun neurri guztiak beteko ditu. Udal pilotalekuko edukiera mugatuta egongo da, eta barruko ibilbidea seinaleztatuta egongo da, pertsonak gurutzatu ez daitezen. Gainera, 6 urtetik gorakoek muturrekoa eraman beharko dute, eta segurtasun distantzia gorde beharko da.